Festivalforfattar 2025
Falturiltu er veldig stolte av å presentera Anna Rommetveit Folkestad som årets festivalforfattar.

Anna har med sin varme humor, distinkte karakterar og visuelt særpreg skapa seg ein solid plass i den nynorske barnelitteraturen.

Ho debuterte med boka Henrik And i 2011. Året etter fekk Anna tildelt Nynorsk litteraturpris for Unni og Gunni reiser, som blei ein serie på tre bøker.

Anna har sidan gjeve ut fleire solide bildebøker, mellom anna Ulla (2019) og lesestart-serien om Besta og Bo.

Stilmessig er bøkene til Anna kjenneteikna av karakterar som er tydelege og interessante både i det visuelle uttrykket og personlegdom. Dei er lette å kjenna att både for barn og vaksne, og med nok spenning til at det er kjekt å lesa dei mange ganger.

Falturiltu sin raude tråd i 2025 – snill og vill – er inspirert av karakterane til Anna. Dei er ofte litt sprø og gjer dei utrulegaste ting, men alltid med hjarta på rett stad.

Ny satsing og festivalpass
Falturiltu vil samla alle vaksenarrangementa og laga ein eigen Heilhusfestival 6 .- 8. november i Stord kulturhus. Her er det allereie mogleg å sikra seg festivalpass til kr. 895,-. Prisen vil stiga til 1095,- etter 1. september.
Festivalpassa gjev deg plass til alle arrangementa under Heilhusfestivalen. Merk at aldersgrensa er 18 år.

Til no er desse stadfesta til Heilhusfestivalen: Stein Torleif Bjella, Agnes Ravatn, Endre Olsen, Taus, Ruth Lillegraven, Arill Riise, Ingrid Belt, Annlaug Børsheim og Kjersti Mjør.

Rekordstor tildeling
Falturiltu gjev ein stor takk til Kulturrådet som gjekk inn for å auka tilskotet til festivalen med 150.000,- i år. Den rekordstore tildelinga på 400.000,- gjer at festivalen kan halda fram med si regionale satsing på framifrå nynorsk formidling. Falturiltu rettar òg ein takk til Fritt Ord for støtte til Heilhus-satsinga, og til Haugaland kraft, Sparebanken Norge og SKL som alle bidrar med midlar til barne- og ungdomsprogrammet. Vestland fylke og Stord kommune gjev fast driftstøtte til festivalen som sikrar kontinuerleg drift.

Open Arena med bandet Oddny
Festivalen opnar med ein ungdomskonsert av bandet Oddny. Gruppa frå Bremanger har fått særleg merksemd for dei karakteristiske tekstane på dialekt, og for å vere eit unikt liveband med ei heilt eigen sceneframferd. Arrangementet 1. november skjer i samarbeid med Open Arena og Bakeriet Frugård – billettar ligg ute her.

Meir festivalprogram kjem snart – følg med!